قصيده عن التغلي

يا محمد غبت عنها أسبوع من باب التغلي
ودي اعرف واكتشف عن حبها لي واختبرها

يا محمد سبعة أيام عجاف ابدون خلي
شفت فيها الويل وعيوني ملازمها سهرها

سبعة أيام الكدر ما أرح عني مثل ظلي .
شلت كل اهموم خلق الله وعايش في كدرها

رحت أدور للتسلي وين ابلقاه التسلي
اخرج امن البيت والقي نفسي ابرم في قطرها

طفت شارع بيتهم ما غير مقبل به مولي
الشوارع مظلمة والقي بشارعهم سفرها

ودي اسمع ذكرها لو من عذولاً بالتبلي
مو مهم اللي يقوله والمهم انه ذكرها

شفت أخوها صدفة واقفي يرحب بعض كلي
وبعضي الثاني همس بأذني تنشد عن خبرها

قمت أهلي به وأنا خايف لساني لا يزلي
شفت شعره في ثيابه قلت هذي من نثرها

وانكسف مني تبسم لي وناظرني بغلي
قال توي كنت بالصالون والناس اشكثرها

قلت فعلاً شفت هالصالون بالناس امتملي
والله انه يكذب الكذاب وانه من شعرها

اعرفه من ملمسه من ريحته من لونه اللي
مثل لون العود حمره من سواد يشتقرها

شلتها بالدس في جيبي وأنا ما أشفيت غلي
ودي استمتع بملمسها وريحً من زهرها

قمت ودعته وليلتها عذابي مستغلي
طول ليلي حاضن الشعرة و أناجي في صورها

بعد سابع يوم من هم بقلبي مستحلي
اتصل بي واحدً ساكت ونفسي في ضجرها

قلت الو وشفيك ساكت رد يا جعلك تغلي
كني اسمع صوت ليمونه بفمه يعتصرها

واهمست وش سهرك للحين في وقت امتتلي
قلت طيفك نعلبو جدك وضحكت من فخرها

واهمست هلحين اجي واخبرك عن دقي وجلي
قلت معقولة وقالت نار شوقي ما اقتدرها

جت وهي متخفية صبح بليل مستضلي
كنها تحسب خطاها مير يفضحها عطرها

نفحها مسك ونثر أنفاسها ورد يستقلي
كنها ترقص على تكة خطاها من بطرها

عنجهيه صدرها تفتك بخصر مضمحلي
لا تنثت تنقسم نصين من خصر بترها

قمت ماني في شعوري كل ما فيني يهلي
كنها المتفضلة بإنقاذ روحي من بحرها

ترتجف في قلبها خوف تولاها تولي
تنفض أيديها ويتقطع نسمها من حذرها

كلما هز الهوى الشباك واحدث فيه خلي
بسملت واستفزت تحضن يديها في صدرها

قالت أنت اشفيك متغيب جفا وآلا تخلي
قلت لا هاذي ولا هاذي ولا حتى قدرها

مير أنا كثرت جياتي وخفت انك تملي
سلهمت بعيونها عضت شفها من قهرها

واخبطت بكفوفها صدري ودمعتها تهلي
قالت اقسم لك برب البيت شوفتك انتظرها

قلت اجل وش وخرك وأنتي لعنواني تدلي
لا يكون انه جفا قالت حشا وارخت نظرها

أنت تدري عن ظروفي حط نفسك في محلي
بنت مثلي خارجه من بيت أهلها وش عذرها

لو قدرت اليوم اجي والقي عذر مقنع وحلي
ما معي كل يوم حجه لهلي ابتكرها

جادل من نسل شيخ لا يهاب ولا يذلي
فاتنة واجمل بنات الكون ما تسوي ظفرها

والله أن اللي ببالك يا محمد ما حصل لي
ذبت واروتني عفاف وكل ما فيني شكرها

ما منعني غير طيب اصلي ولي قدر امتعلي
واللي ادهي من كذا خفت أني انزل من نظرها

قمت أودعها وأنا شوقي يزيد ولا يقلي .
لحظة هدت فرح ساعة وبالكود افتكرها

اوجبت غسلاً على عيني بدمع مسفهلي
قبل تبلغ حلمها والرشد واتمتع بصرها

بعد ما عاهدتها بالله حرمت التغلي
توبة اتغلي ونار افراقها مقوي سقرها

منقوله من احد المنتديات اتمنى ان تنال اعجابكم